சீனா-ஆசியான் தடையற்ற வர்த்தகப் பகுதி பேச்சுவார்த்தைகளின் 3.0 பதிப்பு தொடர்பான முதல் சுற்று ஆலோசனைகள், சீனாவுக்கும் அந்த கூட்டமைப்புக்கும் இடையே செவ்வாய்க்கிழமை அன்று தொடங்கப்பட்டதாக சீனாவின் வர்த்தக அமைச்சகம் தெரிவித்துள்ளது.

சீனா மற்றும் தென்கிழக்கு ஆசிய நாடுகளின் கூட்டமைப்பின் (ASEAN) உறுப்பு நாடுகளின் அதிகாரிகள் மற்றும் அதன் செயலகப் பிரதிநிதிகள் காணொளிக் காட்சி மூலம் கூட்டத்தில் கலந்துகொண்டதாக அமைச்சகம் இணையதள அறிக்கை ஒன்றில் தெரிவித்துள்ளது.

இரு தரப்பினரும் பேச்சுவார்த்தைகளுக்கான நடைமுறை விதிகள், அமைப்பு ரீதியான ஏற்பாடுகள் மற்றும் பணித் திட்டங்கள் போன்ற தலைப்புகள் குறித்து ஆழமான கலந்துரையாடல்களை நடத்தியதுடன், அடுத்தகட்டப் பேச்சுவார்த்தைகளுக்கான கால அட்டவணையையும் செயல் திட்டத்தையும் வகுத்தனர்.

சீனாவும் ஆசியானும் இணைந்து, சீனா-ஆசியான் தடையற்ற வர்த்தகப் பகுதியின் 3.0 பதிப்பு குறித்த பேச்சுவார்த்தைகளை 2022 நவம்பரில் அதிகாரப்பூர்வமாகத் தொடங்குவதாக அறிவித்தன. மேலும் அனைவரையும் உள்ளடக்கிய, நவீன, விரிவான மற்றும் பரஸ்பரம் நன்மை பயக்கும் ஒரு சீனா-ஆசியான் தடையற்ற வர்த்தகப் பகுதியை உருவாக்குவதற்காக, இந்தப் பேச்சுவார்த்தைகள் சரக்கு வர்த்தகம், முதலீடு, டிஜிட்டல் பொருளாதாரம் மற்றும் பசுமைப் பொருளாதாரம் போன்ற துறைகளை உள்ளடக்கும் என்று இரு தரப்பினரும் ஒப்புக்கொண்டனர்.